香港公園的確係放電的好地方!
首先，哩度有朱朱仲意的龜及魚。瀑布背景加幾個大池，已經可以消磨大半個鐘。旁邊的花草不時會更換，今次有薰衣草，好迷人。
最喜歡觀鳥閣，開放式運作，人同鳥可以互相觀望，全方位接觸。今次，鳥兒們在我們身旁唱歌、跳舞，完全吾怕人。上次，有隻大鳥以高速從爸爸身旁飛過，嚇得爸爸。
上次冇入溫室，今次爸爸提議入場觀看。本以為都係花花草草，朱朱會很悶。出乎意料，溫室裏每個小角位都經過悉心打扮，有不同庭院主題，更重要係有不少動物石雕及作品，增添許多光芒。朱朱仲第一次見到很多仙人掌，全程都興高彩烈!
香港公園仲有許多兒童樂園設施，又有沙池，瀑布……可以開心地玩上大半天。
今次最重要係去參觀未來舅母畢業展覽，吸收少少藝術氣質。媽媽本身冇多少藝術細胞，所以特別欣賞藝術家。每件作品都有它的故事，望著作品，睇住作品背後的故事，這一刻很陶醉!
昨晚，媽咪要去聽講座。爸爸收工赶到家中已經7點半，剛好可以接媽咪既更照顧阿囡。
阿囡一見到我番黎，一如以往，興奮地叫”爸爸番黎”, “爸爸抱”。我通常就攬佢一下，然後同佢講爸爸换衫。阿囡好爽快地話”好~~”(拉長音)。然後，跟住我行入房。這個時候，媽咪就静静地出了門口。
换好衣服，洗乾淨手，我就一邊食飯，一邊坐在playmat上陪阿囡。阿囡玩了一下玩具，突然諗起”媽咪呢？”于是，佢睇下房間，睇下廚房，邊行邊叫媽咪。我就同佢講”媽咪去左買野，陣間番黎”, 佢望一望我，講”媽咪shopping, 媽咪陣間番黎”, 跟住就繼續玩玩具。
食完飯，我就開始專心陪阿囡玩。佢係玩具盒中揾到一粒彩色珠珠，我見到就同佢講”爸爸變個個魔術你睇下”。阿囡又好開心地話”好~~”(再次拉長音)。我將粒珠左手交右手，右手交左手然後趁阿囡唔覺意，擺左係佢衣袋裡面。我打開兩隻手，阿囡見珠珠唔見左，覺得好神奇。然後佢第一時間伸手去摸下自己外套既帽，睇下珠珠係唔係果度。因為我上次變都係收埋係果度。但係今次佢就搵唔到喇。阿囡望住我，然後”O”住嘴，攤開兩隻手，話”冇”。我話”爸爸變左係你個衫袋度，阿囡伸手入去摸了摸，然後露出驚奇既表情話”有，係度”。跟住，攞左珠珠出黎，同埋好開心地邊笑邊講”爸爸變，爸爸變”。然後我地就重覆玩左十幾次。
玩完珠珠之後，我地又開始睇書。睇到左接近9點，阿囡差唔多眼睏，我問佢”飲唔飲奶奶？”阿囡答”好~~”(又係拉長音), “飲bearbear奶奶”(因為奶粉的包裝有隻bear公仔) 。我地一邊睇書一邊睇書，好快地，就飲晒成樽奶。
等了一陣，幫阿囡换埋片同睡褲。我同阿囡講”我地上床睇書好唔好？” Yes, 又是一聲拉長音既”好~~”。睇左一陣，阿囡已經打左幾個”喊露”, 我知道係時候準備訓覺了。這個時候，媽咪番黎，但係媽咪未沖涼，要去沖涼先。阿囡已經有小小扭計要搵媽咪。我同阿囡講”我地熄燈講故事，好唔好”。跟住阿囡仍然都係答了一聲細細聲既”好”, 不過就唔係拉長音喇，證明佢真係有d攰了。
我熄左燈後，攬住阿囡，訓係床度，開始講一個嫲嫲由我細個講到大個既”武松打虎”既故事。我講”有一日，武松係山上面遇到一隻老虎，老虎講”我好肚餓，我要食左你，wow”。講到哩度，阿囡好驚咁就捉實我。我安慰佢話”唔使驚，爸爸保護你”。跟住阿囡就定番d。武松同老虎講”唔好食我，我俾d餅餅你食”, 老虎食完都仲係好肚餓，又要食武松，武松又俾麵麵老虎食。(其實哩d都係阿囡中意食既，我諗唔到點講，就將阿囡平時食既食物代入故事入面。) 講講下，阿囡開始要搵媽咪，我就迅速地將故事發展到武松唱歌氹老虎訓覺。然後開始唱訓覺歌，”Twinkle twinkle little star”, “Good evening to you” 等等。阿囡都跟住一齊唱。但係唱兩句就叫一聲媽咪。哩個時候，我細細聲同佢講”老虎訓左，我地唔好嘈醒佢”。阿囡都好乖地細細聲答我”好”。跟住又重覆以上對話兩三次，阿囡終於訓著左。
哩個係第一次我係媽咪沒有在場的情况下，又唔需要抱住阿囡搖搖，就令佢乖乖訓覺。實在太有成功感了，不能不寫番篇blog來記低件事，哈哈！
朱朱8個月才勉強開始進食固體。
1歲後進食固體進入穩定狀態，但大前提必須要電視餸飯。
朱朱每次睇電視都被電視吸左咁，睇到眼定定，完全吾知道也不理會身邊發生什麼事。在這個情況下，媽媽就可以餵粥/飯。每次餵飯，媽媽都十分緊張，要愈快愈好，減少睇電視的時間。無奈你愈想快，佢就愈慢，含飯! 媽媽邊餵邊講:「吾食就吾睇啦」，然後又邊餵水，加快食飯速度。
每次餵飯都要半個小時以上，但一定在一個鐘內。睇電視的時間不斷拉長，且要求愈來愈多，一會兒睇哩套，一會睇果套，煩到我……
每次俾佢睇電視，媽媽都很內疚，但佢吾睇又吾食，十分矛盾!
18個月朱朱終於自己食早餐，食麵、通粉、烏冬, 煮得入味，十五分鐘可以一碗食得乾乾淨淨，而且係不用睇電視。
但係午餐晚餐食飯還需要電視餸飯。
最近，朱朱愛上麵粉團。
前二三個星期開始，我們就是邊玩麵粉團邊餵飯，半個鐘內食完一碗飯。每天玩2次麵粉團，連續玩左2個多星期，連出街食飯都係玩住麵粉團食飯。
一開始時，朱朱還掛住Pocoyo, leapfrog, 但佢無堅持要睇，只係口頭講下佢D朋友。這個星期完全冇提及任何關於電視的東西。
玩麵粉團開始冇咁吸引，停一停，我們轉睇書餵飯，又很成功，實在太大滿足感!
下一步要自己食飯。
要放手，才會進步。
今日參加左吳榮基全日的工作坊。
由早上九點到下午五點，上/下午各3小時，很充實，玩得很開心。
新思維，新意念令我更清楚了解自己及別人的性格，實在獲益良多。
午飯時，主動要陪方太、方生食飯，超級電燈雹，但我真係好享受同你地一齊食飯。隨意話題，慢慢享受午餐，舒服自在。
全日都處於輕鬆狀態，工作坊完後，急急腳趕回家。
開門見到，爸爸餵緊囡食飯，囡只抬頭望了我一眼，然後繼續玩玩具及食飯。
我當時真係有少少失落。
原來我也不是囡唯一的選擇。
我不在家，但有爸爸，爺爺，嫲嫲。
小朋友的適應力可以很快，很高。
爸爸湊囡也很稱職!
多謝老公!
給予私人時間做我喜歡做的事比送名牌，食大餐更貼心，窩心!
我們的創造: 這是香港，我們的家。